IBYO UTARI UZI KU NDWARA YA MBURUGU CYANGWA SE IMITEZI(syphilis).

Iby'ibanze twayimenyaho: Indwara ya Mburugu ni imwe mu ndwara zandurira mu mibonano mpuzabitsina, umuntu uyirwaye iyo ayigiranye n’utayirwaye icyo gihe utari uyirwaye arayandura.
Amoko y'iyi ndwara:Hari amoko 3 y’indwara ya Mburugu. Hari” Venereal syphilis” ikaba ari Mburugu ikwirakwizwa n’imibonano mpuzabitsina  ku bantu 2 umwe ayirwaye undi atayirwaye. 
Ubwoko bwa 2 ni “Congenital Syphilis ” ikaba ari Mburugu umubyeyi yanduza umwana we amutwite cyane cyane inda ifite amezi 4.
Ubwoko bwa 3 ni “Endemic Syphilis ” ibinyoro bikunda kuboneka ahantu henda kuba ubutayu.
Hari na Mburugu iterwa n’agakoko bita “Treponema pallidum”. Aha rero tugiye kwita cyane kuri Mburugu yandurira mu mibonano mpuzabitsina, yandura mu gihe uyirwaye ayikoranye n’utayirwaye”Venereal syphilis”. Mburugu kandi ishobora kuvukanwa.
Mburugu yandurira mu mibonano mpuzabitsina  igaragara mu byiciro 3.
Ibyiciro bya mburugu yandurira mu mibonano mpuzabitsina n'ibimenyetso bibiranga:

• Ikiciro cya mbere “Primary phase”: Iki kiciro kigaragara hagati y’ibyumweru 3 n’amezi 3 uyanduye, kirangwa n’ibimenyetso birimo agasebe ku gitsina kataryana, kadacukura mu mubiri, kadafite amashyira, ukarebye ukabona gakeye.Ikibyimba mu ntantu gikomeye kitaryana.Uyirwaye agira ibiswaganga mu ntantu (mu mayasha). Ako gasebe karijyana nta muti mu byumweru bimwe na bimwe hagasigara cya kibyimba cyo mu ntantu gikomeye kitaryana.

• Ikiciro cya 2”Secondary phase ” kiva ku mezi atatu kikagera ku myaka 3. Umuntu urwaye Mburugu igeze muri icyo kiciro ashobora kugira umuriro, kurwara umutwe, kuribwa mu magufwa, kugira utubyimba twinshi, gusesa ibintu ku mubiri bisa n’ururabo rw’idoma (rose), ashobora gusesa n’ibindi bintu ku mubiri bisa n’ibihushi, kugira ikibara ku munwa kimeze nk’ikirimo amazi, kuzana ibintu mu birenge no mu biganza ugasanga umuntu asatagurika ndetse anashishuka, kumungwa kw’inzara no gupfuka umusatsi.
  

• Icyiciro cya 3”Tertiary phase ”kuva ku myaka 3 kuzamura. Iki cyiciro kirangwa n’uko umuntu ukigezemo asesa ibintu ku ruhu byiyongera, ku munwa haza ikibara gitukura, amagufwa akangirika, umuntu atangira guta umutwe, kuba paralize cyangwa se kugagara ibice bimwe na bimwe by'umubiri ntibikore neza, imyanya y’imbere mu mubiri ikangirika(umutima,umwijima,n’ibindi)[heart renal or liver failure].                                         

Ibindi twamenya kuri mburugu: Ku mwana wavukanye mburugu,usanga asheshe ibintu ku ruhu birimo amazi cyane cyane mu maso, ku maboko, ku gitsina, mu birenge, mu biganza no ku kibuno. Akunda kurwara ibicurane bidakira, utubyimba, kubyimba umwijima, kwangirika kw’amagufwa, kwangirka k’ubwonko, gucika kw’amenyo, gupfa amatwi n’ibindi.

Ingamba zafatwa mu rwego rwo kwirinda iyi ndwara
Kujya kwa muganga hakiri kare ukibona bimwe mu bimenyetso byavuzwe by’iyi ndwara. Kwirinda kwivuza magendu kuko bishobora gutuma indwara yiyongera kurushaho.
Ku birebana n’inama yagirwa abantu mu rwego rwo kuyirinda no kwirinda kuyikwirakwiza, Kubera  ko twamenye aho iyi ndwara yandurira, ubwo kwirinda imibonano mpuzabitsina igihe cyose utarashaka ari ngombwa kuko aribwo buryo bwizewe bwo kuyirinda, ikindi ni ukwirinda guca inyuma uwo mwashakanye.

AKAMARO K'UMUNEKE MU UMUBIRI WAWE

AKAMARO K'UMUNEKE

Icy'ibanze twawumenyaho: Umuneke ni ikiribwa kiboneka ahantu henshi kwisi, ndetse no mu Rwanda ikaba iboneka ahantu hose. Iki kiribwa kikaba gihabwa agaciro gake mu Rwanda ndetse hakaba hari na bamwe banga kugifungura ngo ni ikiribwa cy'abana ariko nk'uko tugiye kubibona gifite akamaro gakomeye kuko gifite ama vitamini asaga 11 ariko reka tuvuge make :
Intungamubiri ziba mu muneke:

Vitamin B6 21.5%

Vitamin C 17.1%
Manganese 16%
Fibers(fibres)[zirwanya kwituma nabi(constipation)] 12.2%
Potassium 12%
Calories5%
Akamaro kawo:Umuneke ni ikiribwa gikenewe kubantu bose kuva kumwana ukageza ku muntu mukuru (abasaza).
Abantu bakora imyitozo ngorora mubiri babona imbaraga bikomotse mu kurya umuneke kuko umuneke ukize kuri potassium.Uyu munyungugu wa potasiyumu ukaba ufite akamaro kanini cyane ku mikorere y'imikaya yaba iyo mu mubiri hasanzwe cyangwa se ifasha umutima gutera kuko iyo umuntu yawubuze mu mubiri we umutima we utera nabi cyane kandi agakunda kurwara icyo bita ibinya cyangwa gufatwa n'imbwa.
Umuneke niyo nkomoko nyayo ya potassium(imyunyungugu) kuko nk'uko twabibonye iyi myunyu ngugu ifasha gukora neza ku muvuduko wamaraso ndetse n’umutima .

Kurya umuneke umwe ku munsi bifasha umubiri kwirinda umuvuduko wamaraso(Hypertension).
Umuneke wamenyekanye bitewe n'uko ufite ubushobozi bwo kurinda igifu ibisebe(Gastric Ulcers). bitewe n'uko ushobora kurwanya acide iba mugifu. Ndetse ishobora no gutuma umubiri uhangana n'ibindi bisebe bishobora kwangiriza umubiri. 
Umubyeyi wawe ashobora kuba yarakubwiye ko mu kurinda amaso yawe uzajya ukunda gukoresha caroti ukiri muto kugirango ahore areba neza,ariko abantu bageze mu zabukuru nabo babona umuneke mu rwego rwo kurinda amaso yabo.
Ibindi twazirikana ku muneke:

Umuneke ninkomoko ikomeye ya vitamini zikurikira :
Vitamini A ifasha mu kurinda amenyo,igikuriro,imikorere y’umubiri n’izindi.
B6 Ifasha umubiri mukugira ubudahangarwa,ikuza imikorere myiza y ‘ubwonko ndetse n’umutima n’ibindi.
C ifasha mu gukiza,ifasha imikurire y’ingingo n’ibindi….
D ifasha umubiri mu kwinjiza imyunyu ngugu.(calcium), iyo nayo igafasha mu gukomera kw'amagufa.
Umuneke ni ikiribwa gitangaje kubantu bakeneye kugabanya ibiro.
Wari uziko umuntu uriye umuneke mbere yo gutangira akazi cyangwa se umurimo runaka bishobora gutuma akorana imbaraga n’umwete mugihe kirekire.

AKAMARO K'INYANYA MU MUBIRI WAWE

DORE ICYO INYANYA ZIMAZE MU MUBIRI WAWE

Iby'ibanze twazimenyaho: Inyanya ni kimwe mu biribwa byagaragaje ubushobozi bwo kurinda ubuzima bw’umuntu.Byaragaragaye ko inyanya ari kimwe mu biribwa bifite akamaro ntagereranywa ku buzima bw’umuntu, kuko  uretse kuba zikungahaye mu ntungamubiri, zinafite ubushobozi bwo kurinda

umubiri indwara zitandukanye.
Intungamubiri zifitemo n'akamaro kazo: Inyanya  zikungahaye kuri vitamin C kandi zibonekamo imyunyungugu(Minerals) ya Manyeziyumu(Mg), Fer, zink, cuivre n’indi myinshi ifasha umubiri kumererwa neza.

Birazwi ko inyanya zishobora gufasha umubiri guhorana itoto kuko zifite "lycogene”, irwanya gusaza k’uruhu.

Inyanya kandi ngo zifite ubushobozi bwo kurwanya ikibazo cyo kubura amazi mu mubiri(Dehydration), ndetse ngo uwaziriye bimufasha kudahura n’ikibazo cyo kunanirwa kwituma(constipation) kuko zifite umunyungugu wa potasiyumu, utuma umuntu yituma neza, kandi uyu munyungugu wa potasiyumu ufite akamaro kanini cyane ku mikorere y'imikaya yaba iyo mu mubiri hasanzwe cyangwa se ifasha umutima gutera kuko iyo umuntu yawubuze mu mubiri we umutima we utera nabi cyane kandi agakunda kurwara icyo bita ibinya cyangwa gufatwa n'imbwa.

Inyanya kandi ngo zigira uruhare mu kurwanya umubyibuho ukabije(Obesity), ndetse ngo kuba 93% byazo bigizwe n’amazi, bituma zishobora guhangana n’ikibazo twigeze kuvuga haruguru cyo kubura amazi mu mubiri, kubura amazi mu mubiri rero bikaba ari bibi cyane kuko nk'uko tubizi kugirango umubiri ubashe gukora, ukenera amazi haba mu gusohora imyanda, kurwanya indwara  cyangwa no gutuma ibindi umubiri ukora bigenda neza byose amazi abigiramo uruhare. 

Ikindi ni uko  inyanya zifasha mu igogorwa ry’ibiryo(Digestion), bityo abantu bakaba bagirwa inama zo kujya bazifata kenshi gashoboka.

Ku bijyanye n’uko inyanya ziribwa,  bivuga ko ari byiza kuzirya ari mbisi kuko ari bwo ziba zigifite umwimerere wa za ntungamubiri n'imyunyungugu twavuze haruguru.

Aha kandi binavugwa ko mbere yo kurya urunyanya ari rubisi, ari ngombwa kubanza kururonga neza kugira ngo imiti baba bararuteye rukiri mu murima ishireho, ndetse n’izindi mikorobe rushobora kuba rufite ziveho.

Inyanya kandi  zishobora gukorwamo umutobe cyangwa se zigatekwa mu biryo nka kimwe mu birungu, gusa ngo iyo zitetswe zitakaza umwimerere wazo, ni ukuvuga za ntungamubiri twavuze haruguru hari icyo zigabanukaho.

Ku muntu wariwe n’inzuki, ibitangangurirwa cyangwa se utundi dusimba, agirwa inama yo gusiga umutobe w’inyanya aho yarumwe kuko zifite ubushobozi bwo kurwanya ububabare bw’aho yarumwe

Umutobe w'inyanya

kandi hakaba hanakira vuba.
 Source: Edited from izuba Rirashe

DORE IBYO UTARI UZI KU NDWARA YA MUGIGA(MENINGITIS)!

INDWARA YA MUGIGA(MENINGITIS)!

Indwara ya mugiga ni indwara ifata utwugara dufubitse ubwonko cyangwa umusokoro uri mu ruti rw'umugongo igatuma utwo twugara tubyimba. Utwo twugara batwita ‘meninges’ mu rurimi rw'icyongereza. Indwara ya mugiga ikaba iterwa n'udukoko dutandukanye. Hari iterwa n'amabagiteri(Bacteria), iterwa n'amavirusi(Viruses) ndetse n’iterwa na n'uduhumyo duto tutagaragarira amaso(Fungi cyangwa champignon).

Ubwoko bw'Indwara ya mugiga bubi cyane ni ubuterwa n’udukoko two mu bwoko bwa bagiteri kuko yo yica vuba kandi ikaba idashobora kuba yakwikiza. Muri bagiteri zikunda gutera mugiga, twavuga nka ‘Neisseria Meningitides; iyi ikaba iza nk’icyorezo, ikaba ari yo mpamvu iyo umuganga abonye umurwayi urwaye mugiga yatewe n’aka gakoko aba agomba kubimenyesha abamukuriye kugira ngo iyo ndwara ikumirwe kuko yandura kandi ikica vuba. Hari n’iterwa n’agakoko kitwa Hemophilus Influenza, Iyi ikaba ikunda kugaragara ku bana.

Ibimenyetso bya mugiga

Mugiga ishobora  kugira ibimenyetso bisa nk’iby’izindi ndwara. Aha twavuga nka Malariya ndetse na tifoyide. Ni ngombwa rero mu gihe ugize bimwe muri ibi bimenyetso kwihutira kujya kubonana na muganga. By’umwihariko, ibimenyetso byayo ni ibi bikurikira:

1. Kuribwa umutwe: Iki kimenyetso kikaba kigaragara ku bantu bagera kuri 90% by’abarwaye mugiga.

2. Kugagara ijosi: Abantu bagera kuri 85% by’abarwayi ba mugiga bagagara ijosi

3. Umuriro mwinshi uvanze no gutengurwa: Ibi bikaba bigaragara ku bantu bagera kuri 90% by’abarwayi ba mugiga.

4. Kuruka

5. Gutinya urumuri

6. Guta ubwenge no kujijinganya

7. Kwikubita hasi nk’umurwayi w’igicuri

Ibi iyo bihuriranye n’uko waba umaze iminsi urwaye indwara zo mu myanya y’ubuhumekero, uba ufite ibyago byinshi byo kuba yaba ari mugiga ufite kuko udukoko twinshi dutera mugiga twibera muri iyo myanya.

Ni bande bafite ibyago byo kurwara mugiga?

Kimwe nk’izindi ndwara, mugiga na yo igira agace k'abantu yibasira bitewe n’impamvu iyi n’iyi. Abafite ibyago byo kurwara mugiga by’umwihariko ni :

1. Abantu bakuze cyane: ibi bigaterwa n’uko ubwirinzi bw’umubiri wabo buba butagishobora kurwanya udukoko twose tuje mu mubiri, bigatuma bibasirwa n’indwara nyinshi.

2. Abana batoya: kubera ko ingingo zabo ziba zitaratangira gukora neza, nta bwirinzi buhagije baba bafite bwo kwirwanaho.

3. Abantu banywa inzoga nyinshi: inzoga ni kimwe mu bintu bituma umubiri udakora neza kandi ikaba yangiza umwijima, kandi  ari imwe mu nyama zifatiye runini umubiri mu bijyanye no kuwurinda indwara no gutuma ukora neza.

4. Abantu barwaye kanseri ndetse n’abafata imiti yayo

5. Abantu bitera ibiyobyabwenge mu maraso: aba baba bari gutuma udukoko dutera indwara twinjira mu maraso tukaba twagera mu bwonko ndetse no mu bindi bice by’umubiri.

6. Abantu bari ahantu hatuwe cyane nko mu nkambi cyamngwa mu bigo bibamo abantu benshi muri rusange

Mugiga ni indwara  ivurwa igakira ariko iyo utinze kuyivuza ishobora kukwica cyangwa ikagusigira ubumuga butandukanye. Ni ngombwa rero kwivuza hakiri kare kandi ukanikingiza mu gihe ugize amahirwe yo kubona urukingo.

Indwara y’umusinziro nyafurika, Iterwa no kurumwa n'Isazi ya Tsetse (African sleeping sickness)

Indwara y’umusinziro nyafurika(African sleeping sickness)

Indwara y’umusinziro nyafurika cyangwa Indwara yo guhondobera ni indwara ifata abantu n’amatungo. Iterwa n’umugera uva mu dukoko twitwa Trypanosoma brucei. Umuntu ashobora kwandura ubwoko bubiri bwayo, Trypanosoma brucei gambiense (T.b.g) na Trypanosoma brucei rhodesiense (T.b.r.). T.b.g niyo ifata abarwayi 98 ku ijana bayandura. Ayo moko abiri aterwa akenshi no kurumwa n’ isazi ya tsetse irwaye ikaba yiganje mu bice by’ibyaro.
Mu mizo ya mbere, iyo indwara ikigaragaza bwa mbere, umurwayi ahinda umuriro, akarwara umutwe, akumva uburyaryate n’ububabare mu ngingo.

Indwara yigaragaza nyuma y’ibyumweru bitatu umuntu arumwe n’isazi ya tsetse. Mu byumweru bikurikiyeho cyangwa nyuma y’amezi ibimenyetso byo ku ntera ya kabiri byigaragaza mu buryo umuntu asa n’udasobanukiwe n’uko yiyumva, ingingo ze ntabashe kuziyobora, akagira ibinya ntasinzire neza. Mu kuyisuzuma bapima agakoko mu kazinga k’amaraso cyangwa mu mashyira ava mu ntobo. amatembabuzi yo mu ruti rw'umugongo ni yo bapima akenshi ngo babashe gutandukanya niba indwara ikiri ku ntera ya mbere cyangwa igeze ku ntera ya kabiri.
Kwirinda ko yahinduka igikatu bisaba ko abaturage yugarije bakorerwa ibizami by’amaraso bagapimwa T.b.g. Iyi indwara ivurwa bitagoranye iyo igaragaye mu maraso hakiri kare mbere y’uko igaragaza ibimenyetso by’uko yaba yarakwirakwiriye mu mitsi. Imiti bayivuza ikiri ku ntera ya mbere ni pentamidine cyangwa suramin. Ku ntera ya kabiri bitabaza eflornithine cyangwa bakungikanya nifurtimox na eflornithine iyo ari T.b.g. Naho melarsoprol yo ikoreshwa mu kuyivura ku ntera yaba igezeho iyo ari yo yose ikaba ariko by’umwihariko yitabazwa mu kuvura T.b.r iyo itangiye gutera izindi ngaruka ziremereye.
Iyi ndwara yiganje cyane cyane mu turere tumwe twa Afurika yo mu majyepfo ya Sahara, ikaba yugarije abaturage bakabakaba miliyoni 70 mu bihugu 36. Mu mwaka wa 2010 yahitanye abantu bagera ku 9000 umubare ukaba wari wagabanutse ugereranyije n’a bantu 34000 yahitanye muri 1990. Abantu babarirwa kuri 30000 nibo bayanduye kuri ubu muri bo 7000 bayanduye mu mwaka wa 2012. Muri abo bayanduye abarenga 80 ku ijana ubasanga muri repubulika iharanira demokarasi ya Kongo. Ahantu hatatu h’ingezi yigeze kuba icyorezo mu mateka ya vuba ubwa mbere ni kuva mu mwaka 1896 kugeza 1906 ni muri Uganda no mu Kibaya cya Kongo ubwa kabiri ni hagati ya 1920 na 1970 mu bihugu byinshi by’ Afurika. Amatungo na yo, urugero ni nk’inka, ashobora gusanganwa iyi ndwara yarayanduye.

SOURCE: https://rw.wikipedia.org/wiki/Indwara_y%E2%80%99umusinziro_nyafurika

INDWARA Y'IGISUKARI(Diabetes mellitus)

Diabetes mellitus ni iki? 
Diyebetes mellitus benshi bakunze kwita indwara y'igisukari ni uruhurirane rw`ihungabana mu mubiri w`umuntu guturutse ku izamuka rikabije ry`ibipimo by`isukari mu maraso. Ibyo biterwa n`ibintu bibiri :

1) Kubura k`umusemburo (hormone) witwa insuline.
2) Kuba uwo musemburo witwa insuline utabasha kwakirwa n`umubiri (Resistance) bifatanyije n`uko insuline itarekurwa ku rugero rukenewe.

Hari amoko abiri ya Diyabete:

1)Diyabete bita Type I, iterwa n`uko utunyabuzima remezo (cellules, cells) twitwa Islet B twangiritse. Iboneka cyane mu bana no mu ngimbi.
2)Diyabete bita Type II, niyo iboneka kenshi. Ubundi ku muntu muzima iyo Insulin itakiriwe neza ngo ikore akazi ishinzwe mu mubiri, habaho kongerwa mu bwinshi byayo, ariko kuri iyi Diyabete, ntabwo habaho kwiyongera k`ubwinshi bw`uwo musemburo. Iyi Diyabete iboneka kenshi ku bantu begeze ku myaka ya za 40, ariko ntibivuze ko n`abandi batayirwara.

Diyabete y`ubwoko bwa 2 itangira buhoro buhoro
Ni indwara itangaje kuko yongera amahirwe yo kurwara indwara z`umutima n`imiyoboro y`maraso (cardiovascular diseases). Ni ngombwa kumenya ko iyo ndwara iza buhoro buhoro kuko mu ntangiriro igaragaza utumenyetso ducye cyane ku buryo uyirwaye ashobora kumara imyaka myinshi ataramenya ko ayirwaye.
Ikibabaje ni uko muri icyo gihe igenda yangiza umutima n`imiyoboro y`amaraso. Byaba byiza kuyipimisha mbere y`uko igeza igihe iganza uyirwaye.

Ibintu bishobora kongera amahirwe (ibyago) kurusha ibindi mu gutera iyi ndwara!!

1. Ni imwe mu ndwara iva mu muryango (hereditaire). Kuba ufite umubyeyi cyangwa umuvandimwe wayirwaye.
2. Umubyibuho ukabije cyane cyane iyo inda yabyibushye, ibyo bigaragara ku muzenguruko w`urukenyerero (ceinture) kuba gore 80cm, ku bagabo 94cm.
3. Imirire yiganjemo ibinyamavuta bikomoka ku nyamaswa. Kuba kandi iyo mirire ikennye ku mboga n`imbuto.
4. Kuba urwaye indwara y`umuvuduko w`amaraso ukabije (hypertension) ibyo na byo byongera amahirwe yawe yo kuba warwara Diyabete yo mu bwoko bwa kabiri.
5. Kutanyeganyega (sedentarity lifestyle). Uko udakora imyitozo ni nako wongera amahirwe yawe yo kuyirwara.

6. Kuba wararwaye Diyabete mu gihe cyo gutwita, aha turavuga abagore, iyo yitwa ‘Gestational diabetis”. Kuba umugore kandi yarabyaye umwana munini cyane hejuru ya 4 kg na byo byongera amahirwe mabi.
7. Umuvuduko ukabije w`amaraso (hypertension), ubwiyongere mu maraso bwa triglyceride, kugabanyuka kwa HDL-Cholesterol ari yo cholesterol nziza, hamwe n`ibipimo by`isukari nyinshi mu maraso igihe umuntu atariye.
8. Imyaka yigiye hejuru, Diyabete yo mu bwoko bwa kabiri yibasira abarengeje imyaka 40 y`amavuko.Diyabete y`ubwoko bwa kabiri ni indwara yakwirindwa! Niba ufite kimwe cyangwa byinshi muri ibi byavuzwe hejuru, byaba byiza ugiye kwa  muganga hakwegereye ukisuzumusha. 

DORE IMPAMVU ZITERA KUNUKA IGIKARA!

TUMENYE BYINSHI KU NDWARA ABENSHI BAKUNZE KWITA "KUNUKA IGIKARA"
IKIBAZO CY'UMUKUNZI WA BAZA MUGANGA: mfite imyaka 21 nkaba ndumuhungu mfite ikibazo cyo kunuka mukwaha.
ngira isuku ihagije ariko byabaye ibyubusa.
ese biterwaniki? ese birakira?
Amazina yanjye nibanga rikomeye
Murakoze! to: "bazamuganga1@gmail.com" <bazamuganga1@gmail.com>
IGISUBIZO:
Kimwe n'uyu mugenzi wacu, usanga hari abafite ikibazo kibabangamiye bo ubwabo ndetse n’ababegera bitewe n’umwuka mubi ubaturukaho ari byo bamwe bita KUNUKA IGIKARA. Icyo kibazo cyo kugira umwuka mubi usanga abantu batandukanye baba batazi intandaro yabyo akaba ari kubw’izo mpamvu twagerageje kubashakira iby'iyi ndwara tubyitondeye kugirango abantu basobanukirwe mu buryo bwuzuye impamvu zitera gusohora umwuka mubi cyangwa KUNUKA IGIKARA ndetse n’icyakorwa ngo umuntu abyirinde.

IMPAMVU ZITERA KUNUKA IGIKARA:
Icyuya cy’umuntu cyo ubwacyo ni kimwe mu bishobora kuba impamvu

zatuma umuntu agira uwo mwuka utari mAwiza kuko ubusanzwe icyuya cy’umuntu ntikigira impumuro ariko iyo kibaye ku ruhu rw’umuntu igihe kirekire, udukoko tuba ku ruhu tuzwi ku izina rya bagiteri(bacterie) dukoresha ibiri muri icyo cyuya nk’ibiribwa byatwo bityo natwo tugasohora umwuka unuka nabi cyane.
 IMIKORERE Y'IMVUBURA ziba mu muntu cyane

cyane izo mu kwaha mu mayasha cyangwa se no mu gitsina na zo zishobora kuba imwe mu mpamvu zituma umuntu asohora umwuka mubi cyane kuko iyo izo mvubura ziherereye aho tumaze kuvuga nyine, zivubura ibyuya birimo poroteyine n’ibinure(sebum) bitunga udukoko two ku uruhu rwo mu kwaha ndetse no mu gitsina bityo natwo aho turi kuko twabonye ikidudutunga, tugasohora imyanda ifite umunuko ari nabyo bikururira uwo biriho umunuka.
 ISUKU NKEYA KU MUBIRI ndetse no mu MYENDA nayo ni imwe mu mpamvu

zitera umuntu gusohora umwuka mubi. Nk’abantu batajya bakunda kugirira isuku imyenda y’imbere ntibayimesa kandi ntibayihindure buri munsi ( nk’amasogisi, amakariso, isengeri, isutiye, amasogisi, n’ibindi) bibatera kugira umwuka mubi kuko biba byahuriranye n’ibyuya bigasohora umwuka mubi.

Hari IBIRIBWA n’IMITI bimwe na bimwe bigira uruhare mu gutuma

umuntu agira impumuro mbi kuko iyo
umuntu ari kubira ibyuya bisohoka bifite umwuka mubi.Urugero rw'ubwoko bw’ibiribwa aha twavuga nka Tungurusumu ndetse n’imiti imwe n’imwe isohokera mu ruhu bityo bigatanga impumuro mbi igihe biri gusohoka.

IBYAKORWA MU KURWANYA IMPUMURO ITARI NZIZA:
Icyambere ni ukwirinda ibintu byose bituma umuntu agira impumuro mbi agerageza gukaraba umubiri wose byibura rimwe ku munsi akoresheje amazi meza n’isabune kandi mu koga akibanda cyane cyane ahantu aba azi habira ibyuya cyane kurusha ahandi nko mu birenge, mu kwaha n’ahandi.

Icya kabiri ni ukwambara buri munsi imyenda imeshe yemwe n’itagaragara y’imbere akitwararika isuku yayo, ayihindura buri munsi ayimeshesha amazi meza n’isabune, ku muntu watangiye kugira ikibazo cyo gusohora umwuka unuka akagerageza kumesa imyenda y’imbere yifashishije amazi ashyushye ndetse ababishoboye bakanayitera ipasi.
Indi nama ya turangirijeho ihabwa abantu bafite ikibazo cyo kubira ibyuya binuka bikabatera kurangwa n’impumuro mbi, ni ugukoresha imiti irinda umuntu kubira ibyuya byinshi kandi nibisohotse bigasohoka bifite impumuro nziza cyane cyane ko iyo miti ibuza udukoko tuba ku ruhu gukura vuba vuba, ibi bikaba bikorwa cyane ku bantu barenze ikigero cy’ubugimbi n’ubwangavu. Tukaba twabibutsa ko inama zose zatanzwe hejuru ziramutse zinaniranye ufite ikibazo cyo kubira ibyuya binuka akagumya akanuka yajya kwa muganga bakamuha umuti uvura kiriya kibazo kandi rwose birakira.
TWIYIBUTSE ICYO UMUNTU YAKORA KUGIRANGO YIRINDE KUNUKA IGIKARA:
1. Gukaraba umubiri wose nibura rimwe ku munsi,
2. Gukoresha imiti irinda umuntu guhumekera mu ruhu cyane (antirespirant) dore ko ngo imwe muri yo ibuza udukoko tuba ku ruhu gukura vuba vuba bikaba bikorwa cyane cyane ku bantu barenze ikigero cy’ubugimbi n’ubwangavu,
3. Kwambara imyenda imeshe buri munsi kandi yarafurishijwe amazi ashyushye ikanahita iterwa ipasi,
4. Koza ibirenge buri gihe uko ugiye kwambara inkweto, ukabihanagura, byaba na ngombwa ugakoresha umuti ukurinda udukoko dutera ibimeme,
5. Kwambara inkweto zifunguye n’amasogisi adashyuha ngo atange icyuya,
6. Kwirinda ibiribwa ukeka ko biturukaho iyi mpumuro mbi.

INDA KU MUBIRI!

TUMENYE INDA N'AMOKO YAZO!
Igihe nari nkiri mu mashuri abanza, Umwarimu yanyuraga kuri buri munyeshuri areba mu musatsi we ndetse akamanura n'imyenda akamureba mu gatuza no mw'irugu. Noneho ibyo byarangira, nyuma ukumva bahamagaye amazina y'abana basanzeho inda ngo bajye kwitaba mu biro, bakabahamagara bakoresheje indangururamajwi y'ikigo twigagaho. Jye nabonaga ari iyicarubozo. Nari ndwaye inda zo mu mutwe, n'ubwo mama wange ntako atagiraga ngo akore ibishoboka byose kugirango nzikire, byabaga iby'ubusa. Abantu baransekaga cyane. Iyo twabaga turi kumurongo tugiye gufata ifunguro rya saa sita dore ko naryaga ku ishuri kumanywa,wasangaga abana twiganaga barabaga bandyanira inzara, bakanyitaza cyane, ndetse ugasanga bari kurwana inyuma cyangwa imbere yange ngo hatagira unyegera nkazimwanduza.Byari biteye agahinda. Sinashoboraga kuba nagira inshuti nk'abandi bana, kuko nahoraga nanifitiye isoni n'ikimwaro.Ubu cyakoze ndizera ko ibigo by'amashuri bimaze gusobanukirwa iby'utwo dusimba duto. byavuzwe n'umukobwa witwa Amberada wo muri Amerika. Ushobora kuba  nawe ujya ubona umwana wawe ahora yishimagura ukayoberwa impamvu.  Ushobora no kuba ujya wumva mu mutwe(mu musatsi) hakuryaryata. Izo zishobora kuba ari inda! Gusa niba ari zo ibyo ntibigutere impungenge. Rapport zigaragaza ko buri mwaka, abantu hagati ya miliyoni 6 na 12, barwara inda zo mu mutwe. Inyinshi muri izo milioni usanga ari abana ariko ntibibuza ko n'abantu bakuru zibafata. Ku bantu bize mu bigo birimo internat nibo bazi cyane iby'utu dukoko duto , aho usanga baragiye batwita amazina nk'IBIKWAVU, IBIMASA... Reka turebe iby'utwo dusimba tubivuye i muzingo:
Inda ni udusimba duto ushobora gusanga ku binyabuzima bimwe na bimwe bifite amaraso harimo n,abantu. Utwo dusimba rero tukaba dukenera kunywa amaraso y'icyo kinyabuzima kugirango tubeho, ku bantu utwo dusimba dukunze kuboneka mu mutwe, ku bindi bice by'umubiri(cyangwa se mu myenda), ndetse no kubice byegereye imyanya ndangagitsina. kugirango izo nda zibeho rero zikaba zinyunyuza amaraso ya wa muntu maze zikaba ariyo zikoresha mu kugirango zibone ibyo umubiri ukeneye.

Dukurikije ibyo tumaze kuvuga rero inda twavuga ko zigabanyijemo ubwoko butatu:

1)INDA ZO MU MUTWE(pediculus humanus capitis)

2)INDA ZO KUMUBIRI ( ZO MU MYENDA)(pediculus humanus corporis)

3)INDA ZIKUNDA KUBA HAFI Y'IMYANYA NDANGAGITSINA(mu mayasha)(pthirus Pubis)

1)Inda yo mu mutwe ikuze neza ishobora kureshya na millimetero 2kugeza kuri 3! zikaba zikunze kugaragara cyane mu mutwe ndetse no ku gice cyo mw'irugu(mw'ijosi).

Mu buryo bwo kubyara inda zo mu mutwe zitera amagi yazo ku mizi y'umusatsi cyangwa se aho imisatsi itereye, maze igihe cyagera amagi akavamo inda nkuru. izi Inda ntabwo ziguruka cyangwa ngo zisimbuke nk,uko bimeze ku mbaragasa ahubwo zigendera ku tuguru twazo tune(4). Izi nda zo mumutwe rero zikaba zinazwiho gukwirakwiza indwara zimwe na zimwe.
  Kandi Izi nda  zikaba zishobora no kwandura; ni ukuvuga ziva ku muntu zijya ku wundi, cyane cyane nko kubantu batizanya ibintu byo kwambara; urugero nk'ingofero cyangwa nk'abadamu basangira ibitambaro byo mu mutwe. imbwa n'injangwe na byo bikaba bizwiho gukwirakwiza utwo dusimba.

2)Inda yo mu myenda ikuze neza yo ishobora kureshya na millimetero 2.3 kugeza kuri 3.6; inda zo mumyenda zikunda kuba mu myenda y'abantu kandi zikaba ari naho zitera amajyi yazo kugirango zororoke. Iyo zikeneye kurya ziva mu myenda zikagendagenda ku mubiri w'umuntu ziriho mu rwego rwo kugirango zimunyunyuze amaraso dore ko ayo maraso zinywa ari nayo abasha kuba yazitunga! Izi nda zo mu myenda rero nazo zikaba zizwiho kuba zakwirakwiza indwara zimwe na zimwe!!!! nanone kandi izi nda ni zimwe muzandura cyane umuntu akaba yazanduza mugenzi we binyuriye mu kuba begeranye, cyangwa se

bakoresha nk'imyenda imwe(bambarana)! Gusa izi nda zikunze kwibasira cyane abantu bakunze kuba ahantu batabasha kwikorera isuku ihagije{ urugero:nk'abantu batagira aho kuba , impunzi...). Bitandukanye n'uko twabibonye ku nda zo mumutwe; Imbwa, Injangwe n'ubundi bwoko bw'utunyamaswa ntabwo bigira uruhare mu gukwirakwiza inda zo mu myenda!! Gukora isuku bihoraho ni ukuvuga koga ndetse no kumesa imyambaro yawe no kuyambara uyisimburanya; ni wo muti wonyine wo kurwanya inda zo mu myenda hamwe n'indwara zishobora kuzikomokaho!
 3)Inda yo mu mayasha ikuze neza ishobora kureshya na millimetero 1.1kugeza kuri1.8! inda zo mu mayasha akenshi uzisanga aho nyine mu mayasha ku bwoya buri iruhande rw'imyanya myibarukiro( insya); gusa hari n'igihe ubwoko bw'izo nda ushobora kubusanga ahandi hantu hashobora kuba ubwoya ku mubiri ( urugero nko ku bitsike, ku ngohe,mu gituza, mu kwaha ndetse nahandi nahandi...) inda zo mu mayasha zikunda kwandura cyane mu gihe umuntu akoranye imibonano mpuzabitsina na mugenzi we uzirwaye! Nanone

bitandukanye n'inda zo mu mutwe, inda zo mu mayasha ntabwo ziri muzishobora gukwirakwizwa n'inyamaswa nk'imbwa, injangwe n'izindi... Ibirenze kuri ibyo kandi inda zo mu mayasha zishobora kuba zavurwa n'abaganga kandi zigakira neza kuko imiti yazo iriho!Click here to download the pdf pdf document: INDA N'AMOKO YAZO.pdf