Soma hano ibintu 5 byoroshye wakora ukagira amenyo y’umweru bita urwererane kandi bikakurinda kunuka mu kanwa.

Dore inzira 5  zoroshye wacamo ukagira amenyo y’umweru bita urwererane. Kandi zikakurinda impumuro mbi yo mu kanwa.

Abantu benshi usanga bashimishwa kandi bakisanzura ku muntu ukunda kumwenyura cyangwa se ukunda guseka. Kubera iyo mpamvu buri muntu uwo ari we wese aba yifuza kugira amenyo y’urwererane. Mu bihugu byateye imbere ho usanga  abantu benshi batanga ibihumbi n’ibihumbi by’amafaranga buri mwaka kugirango bagure imiti ituma amenyo yabo aba urwererane; ibyo na hano iwacu bikaba byaratangiye kuhagera kuko hari bamwe babikora. Gusa nubwo iyo miti ituma bagera ku ntego yabo bakagira amenyo akeye, nanone ishobora guteza ibindi bibazo bikomeye mu mubiri w’abayikoresha, igatuma baba abantu badafashije mu bijyanye n’ubwirinzi bw’umubiri kandi bagahorana intege nkeya mu gihe runaka, biturutse kuri iyo miti.

Aha rero naguteguriye ibintu bitanu wakora kugirango ugire amenyo y’umweru, kandi udatakaje amafaranga ngo uragura imiti muri farumasi , dore ko gukoresha iyo imiti bigira ingaruka mbi ku mubiri wawe nubwo bidahita byigaragaza. Ubu buryo ngiye kukubwira buragusaba kugira ibintu bimwe na bimwe uhindura mu buzima bwawe . Ngaho twagiye:

Dore uburyo butanu bworoshye wakoresha kugirango ugire amenyo y’umweru.

1)  Sukura ururimi rwawe: Uti nabikora gute? Mu gihe uri gusukura amenyo yawe ukoresheje uburoso na colgate, hita uboneraho umwanya wo gusukura ururimi rwawe, uturutse uburoso  inyuma uza imbere aho ururimi rurangirira nibigukundira ugeze uburoso no mu gisenge cy’akanwa. Ibi bizatuma utagira impumuro mbi mu kanwa maze bitume ugirana n’abandi ibiganiro byubaka wisanzuye kuko bazaba batakwinuka cyangwa ngo nujya kuvuga birebere hirya kubera umwuka mubi uri gusohoka mu kanwa kawe. Nanone nukora isuku ku rurimi rwawe uzaba uhashyije indiri y’udukoko two mu bwoko bwa bagiteri twororokera ku rurimi maze tukaba intandaro yo kugira ururimi rusa nabi ndetse tukanatuma ku menyo hahomaho ibintu bituma agira irindi bara ritari umweru. Koresha uburoso bworoshye bufite ikirindi kirekire mu gihe usukura ururimi rwawe kandi nurangiza wunyuguze neza ubwo buroso wakoresheje mbere yo kububika.

Ako karumvikanye. Sibyo se? Ubu noneho tugiye ku kintu cya kabiri ugomba gukora. Uriteguye?

2)  Hinduranya uburoso bwawe byibura rimwe mu mezi atatu: Wirindira ngo uburoso bwawe bupfukagurike bushireho uturoso, cyangwa ngo bugeze aho uturoso turiho twihinahina, ku buryo butakigukorera isuku neza. Igihe wumva uburoso bwawe bumaze igihe cyangwa bwangiritse buhindure. Kuki urindira ngo bupfuke bwose?  Gura ubundi. Byaragaragaye ko ibyiza, umuntu agomba guhindura uburoso akoresha byibuze rimwe mu mezi atatu. Nawe ni uko. Ugomba guhindura uburoso bwawe buri gihe, ku bw’inyungu z’ubuzima bwawe n’ubuzima bw’amenyo yawe. Sibyo se?

 Tugiye ku kintu cya  gatatu wakora. Cyo kiravuga ku bintu warya ngo ugire amenyo akeye, yererana de. Twese dukunda kurya. Wowe si uko se? Twagiye.

3)  Rya imbuto n’imboga nyinshi: Gira akamenyero ko kurya cyane imboga ndetse n’imbuto. Ibi bigirira akamaro kanini amenyo yawe ndetse n’umubiri wawe wose muri rusange. Nugira akamenyero ko kuryaimbuto n’imboga bizatuma amenyo yawe ahora akeye kandi afite isuku kuko imbuton’imboga bibamo intungamubiri zifasha mu gukuraho ibintu bihoma ku menyo bigatuma azaho ibibara bisa nabi, kandi nanone izo ntungamubiri zikarinda amenyo kwicamo imyobo(gucukuka).

Ngaho reka tujye ku cya kane.

4)  Ogesha amenyo yawe Vinegre ikomoka ku mutobe wa pome(Apple cider vinegar):Ibi bizatuma ugira inseko isusurutse kandi ikurura bose bakakwisanzuraho kuko bizatuma ugira  amenyo  yererana, kandi mu kanwa kawe nta mpumuro mbi izaba irimo. Dore uko ugomba kubigenza : Fata incuro imwe ya vinegre uvange n’incuro ebyiri z’amazi, ubundi ube aribyo ukoresha mu koza amenyo yawe; ubikore nko mu gihe kigeze byibura umunota umwe ni ukuvuga amasegonda 60. 

5)  Iyunyuguze n’amazi meza igihe umaze kurya indimu: Uti ibi byo se ni ibiki?: Hari Imbuto zimwe na zimwe zigira vitamine C nk’indimu, amacunga, imyembe n’izindi. Akenshi izi mbuto usanga ziba zirimo acide ku buryo iyo uziriye zangiza amenyo yawe,  iyi acide ikaba ikuraho igice gikomeye kiba gifubitse iryinyo bita enamel, maze igatuma ryangirika cyangwa se rikazaho ibibara mu buryo bworoshye. Dore rero nkugire inama: Igihe umaze kurya izi mbuto hita wiyunyuguza ukoresheje amazi meza niba ushaka kurinda amenyo yawe.
 Byateguwe na RUTAYISIRE François Xavier (a medical student in Year 4(DOC2) ,at University of RWANDA ,School of medicine).

Dore ibyo utari uzi ku ndwara ya Malariya.

Malariya

Malariya ni indwara iterwa n’agakoko ko mu bwoko bwa parazite kitwa plasmodium, gakwirakwizwa no kurumwa n’umubu wanduye kuko warumye umuntu urwaye malariya. Mu mubiri, utwo dukoko duhita tujya mu mwijima aho twikuba tukaba twinshi hanyuma tukanduza insoro zitukura (red blood cells cg globules rouges)

Malariya igaragara cyane mu bice bishyuha, ibibamo amashyamba, cg se ahantu hareka ibidendezi by’amazi

Bimwe mu bimenyetso bya malariya twavuga:
 *. umuriro
*. kumva ufite imbeho (niyo haba hashyushye)
". kuribwa Umutwe
*. kumva ubabara mu ngingo
*. kuruka
Akenshi ibi bimenyetso bitangira kugaragara nyuma y’iminsi 10 na 15 urumwe n’uyu mubu.

Malariya iyo itavuwe neza iba icyorezo gikomeye kuko ishobora kwangiza ibice by’ingenzi by’umubiri (nk’umutima, ibihaha, impyiko n’ubwonko) bikurizamo n'urupfu.

Bimwe mu byo wakora mu kwirinda malariya;
• Mu gihe warwaye ni ugukoresha imiti (ubu uri rusange mu Rwanda no mu karere dutuyemo ni Coartem cg indi miti igaragaramo artemisinin; aha wakwegera Muganga cg umufarumasiye akagusobanurira ku byerekeye iyi miti)

• Hari gukoresha imiti yica imibu izwi nka insecticides
• Kuryama mu nzitiramibu nabyo ni ingenzi mu kurwanya malariya

Ni gute namenya niba ndwaye malariya?

Malariya igaragazwa n’ibizami bya laboratwari bamaze kugufata amaraso, gusa biroroshye kumenya ko urwaye malariya ukurikije ibimenyetso twavuze haruguru.

Malariya ku bagore batwite

Umugore utwite agomba kwirinda malariya mu buryo bwose bushoboka, kuko ishobora kumuhitana kimwe n’umwana atwite. Malariya iteza ibibazo bikomeye harimo; kubyara igihe kitageze, kubyara umwana utuzuye, n’ibindi.
Umugore utwite agomba gufata imiti ya malariya ku nama za muganga gusa.

Bisangize n'abandi turandure malariya burundu

Indwara yo kugorama kw'igitsina. Ese biterwa n'iki? bivurwa bite? ninde ufite ibyago byo kugorama igitsina?

Indwara yo kugorama kw'igitsina

Peyronie's Disease cyangwa se kugorama kw’igitsina cy’umugabo ni indwara igaragazwa no kugorama bikabije kw’igitsina cy’umugabo, iyi ikaba ari indwara yavumbuwe bwa mbere n’umuganga uvura indwara zibagwa wo mu gihugu cy’Ubufaransa, ari we Francois de la Peyronie, hari ahagana mu mwaka wa 1743.

Kugeza ubu nta muntu uzi neza ikintu gitera iyi ndwara. Cyakora, abahanga mu by’ubuzima bw’imyororokere bo batekereza ko iyi ndwara yaba iterwa n’impanuka ikabije yaba yageze ku gitsina, cyane cyane nko mu gihe cy’imibonano mpuzabitsina ikoresheje ingufu nyinshi cyane zikabije.

Bakomeza bavuga ko hari abagabo bamwe bagira ibitsina bigoramye ariko kugorama kwabyo bidaturutse kuri iyi ndwara ahubwo ugasanga ari ko bameze mu buryo bwa karemano. Ariko kandi ngo uko byaba bimeze kose, kugorama kw’igitsina cy’umugabo bitera ububabare bukabije mu gihe umugabo akora imibonano mpuzabitsina ndetse bigatuma igitsina cy’umugabo kigaragara nk’aho ari gito mu burebure nyamara Atari ko bimeze. Iyi ni nayo mpamvu ituma abagabo bafite iki kibazo bashaka ubufasha kwa muganga kugira ngo barebe ko igitsina cyabo cyagororoka.

Mu ngaruka ziterwa n’iyi ndwara,harimo kugira imikorere mibi y’igitsina mu bijyanye no gufata umurego, kwihina ndetse no gukomera bikabije kw’igitsina cy’umugabo, kwigunga bitewe no kutiyumva neza mu muryango.

Kugeza ubu rero hari uburyo butari ukubagwa bwavumbuwe bwo gukosora iki kibazo. Ubwo buryo bukaba bukoresha akantu kameze nk’insimburagingo bita extenseur du penis gatuma igitsina kigororoka. Ubu buryo bubasha gukosora iki kibazo ku rugero ruri hagati ya 40 na 70 ku ijana.

Mu bushakashatsi yakoze, Dr. Wendy avuga ko ku bagabo bafite igitsina kigoramye, byaba ari karemano cyangwa bituruka ku ndwara ya ‘peyronie’ ari ngombwa kujya kwa muganga mu bihe bikurikira:

-Igitsina cyawe kikubabaza cyane mu gihe cy’imibonano mpuzabitsina
-Mu gihe ubabara igitsina gifashe umurego
-Mu gihe wumva iki kibazo kikubangamiye

Tukaba rero tukugira inama yo kugana kwa muganga niba ufite iki kibazo kugira ngo uhabwe ubufasha.

Sobanukirwa akamaro ka karoti Ugire uruhu rwiza kandi rukeye, utane n'ubuhumyi, gusaza imburagihe, kurwara kanseri n'indwara z'umutima .

Akamaro ka karoti

Hehe no kongera kurwara indwara zituruka ku kubura Vitamine A. Urugero nk'ibibazo bimwe na bimwe by'amaso. Rwose byibagirwe, kuko ubifashijwemo n'iki gihingwa gihambaye gisa na Orange, ushobora kubona Vitamine A umubiri wawe ukenera buri munsi. Iki gihingwa kandi, cyagufasha mu bintu byinshi nko kugira uruhu rwiza cyane kandi rukeye, kikakurinda kanseri, kandi kigatuma udasaza imburagihe, kuko karoti ikungahaye ku bintu birinda ubusaza. Soma byinshi ,umenye ukuntu wakoresha iki gihingwa kugirango kikugirire akamaro mu buryo bwuzuye:

1.Kongera ubushobozi bw’amaso: Karoti ikungahaye ku ntungamubiri zitwa beta-carotene zigera mu mubiri zigahinduka vitamin A igira uruhare mu kongera ubushobozi bwo kubona kw’ijisho.

2.Gukumira Kanseri mu mubiri: Ubushakashatsi bwerekana ko karoti zigabanya ibyago byo kwandura kanseri yo mu bihaha ndetse no mu ibere, muri iki gihingwa harimo falcarinol igira uruhare mu gukumira indwara ya kanseri.

3. Kurinda gusaza imburagihe: Kuba karoti ziganjemo intungamubiri za beta-carotene ikungahaye ku bituma uturemangingo tutangirika mu mubiri usanga umubiri w’umuntu ukoresha karoti ukora neza bigakumira ubusaza bwa vuba.

4. Kurinda indwara uruhu: Vitamini A igira iboneka muri karoti irinda uruhu imirasire y’izuba yarwangiza, kuba mu mubiri nta vitamin A irimo bituma uruhu, umusatsi ndetse n’inzara bikakara ndetse bikaba byahindura ibara; abenshi bakoresha karoti bavanzemo ubuki mu kugira mu maso uruhu rwiza.

5. Kurinda indwara y’umutima: Ubushakashatsi bwagaragaje ko intungamubiri za carotenoids zifitanye isano no kugabanya ibyago byo kurwara umutima, karoti ntabwo zikungahaye gusa kuri beta-carotene ahubwo harimo na lutein igabanya ibipimo bya cholesterol mu mubiri ariyo iganisha ku mutima.

6.Isuku ku menyo ndetse no mu kanwa: Karoti ni igihingwa cyoza amenyo no mu kanwa, zikura ibintu byagiye bisigara mu menyo bishobora kuyangiza kuko zitera ivubura ry’amacandwe menshi, imyunyugugu iri muri karoti irinda amenyo ukwangirika.

Inanasi.Dore ibintu 7 by'ingenzi ishobora gufashamo umubiri wawe.

 AKAMARO K'INANASI MU MUBIRI WAWE
Inanasi ibonekamo isukari ndetse kenshi abayirya bakurikirana uburyohe bwayo no kuba igira amazi menshi, ariko hari n’ibyiza byinshi ifitiye umubiri w'umuntu reka turebere hamwe bimwe muri byo.

1. Inanasi ifasha gukomeza amagufa

Inanasi ngo ibamo umunyungugu wa "manganese”, iyi ikaba yuzuyemo ibifasha umubiri kugira amagufa akomeye. Iyi manganese kandi  ifasha kubungabunga amagufa ku bantu bashaje ndetse ituma uruhu rusa neza. Inanasi kandi  ifasha kuringaniza urugero rw’isukari mu mubiri.  
       2. Ifasha mu igogorwa ry’ibiryo

Uru rubuto  ni ingenzi mu igogorwa ry’ibyo kurya. Umuntu urya inanasi kenshi  aba arimo kwirinda ibibazo bishobora guturuka ku igogorwa ridakorwa neza. Ibi bikaba  biterwa na bromelaine iboneka mu inanasi ikaba  ifasha indurwe bigatuma acide zigabanuka mu gifu.
      3. Ifasha gukomeza ingingo
Inanasi ifasha ingingo gukomera ndetse ikanarinda uburibwe mu ngingo bwa hato na hato, kandi ikanafasha mu gutuma mu gihe umuntu yakomeretse akira vuba ibikomere mu gihe yamenyereje uyu mubiri we uru rubuto.
     4.Inanasi ni ingenzi ku buzima bwo mu kanwa
Mu gihe abantu batari bake usanga bataka indwara z’amenyo,  umuntu ukunda kugira inanasi mu mbuto afata bimurinda izi ndwara kuko  ifasha mu gukomeza amenyo.
     5.Ifasha kureba neza
Urubuto rw’inanasi  rubonekamo ibyitwa beta carotene, ibi  bikaba ari ingenzi mu gutuma umuntu abasha kureba neza. Kurya inanasi buri munsi rero  bikaba bishobora kurinda umuntu ibyago by’indwara z’amaso.
    6.Ibonekamo vitamini C
Iyi vitamini ifasha umubiri kuringaniza urugero rw’ubukonje mu mubiri ndetse ikarinda ubudahangarwa bw’umubiri.
     7.Inanasi ishobora kurinda iseseme
Kuba ifasha mu kubungabunga ubuzima bwo mu kanwa, ngo haniyongeraho ko mu gihe byibura umuntu anyweye ikirahuri kimwe cy’umutobe w’inanasi ngo bishobora kumurinda kuruka.
source :izuba-rirashe.com

Ese umuntu amize igiceri, Icupa, ikirahure cyangwa ikindi kintu gikomeye Hari ikibazo byamutera mu mubiri?

Ikibazo cy'umukunzi wa Baza Muganga: Mfite ikibazo iyo umuntu amize agapande k'icupa bigenda gute? Igisubizo: Ubusanzwe iyo tugize ikintu runaka turya gihita gikorerwa igogorwa (Digestion), iryo gogorwa rigtangirira mu kanwa rikarangirira mu rura runini ibyo wariye biri hafi gusohoka! Iryo gogorwa akenshi imisemburo mu cyongereza bita enzymes Niyo igira uruhare runini mu gucagagura ibyo wariye, nubwo Amenyo n'imikaya igize igifu n'amara nabyo bibigiramo uruhare rugaragara! ubwo rero urumva Ko kugirango 

Ifoto y'umuntu wamize amakanya ya plastics

ikintu gikorerwe digestion hagomba kuba Hari enzyme yabugenewe igicagagura! Iyo ntayihari icyo kintu wariye gisohoka uko wakiriye! Icupa rero kubera nta musemburo Uba mu mubiri ucagagura ibirahure cyangwa plastic, rizasohoka uko wakaririye. Ubwo ikibazo cyavuka ari uko yenda ryari rityaye rikaba ryagupfumura Amara, cyangwa rikagutera icyo mu kiganga twita fistura! Urakoze cyane kutubaza utanyuzwe n'ubusobanuro tuguhaye wongere utubaze!

SOBANUKIRWA INDWARA Y'UMUGONGO(ANKYLOSING SPONDILITIS) N'UKO IVURWA

Ankylosing Spondilitis :Indwara ifata Umugongo mu gice cyo hasi.
Ankylosing Spondilitis ni indwara ifata ingingo z'uruti rw'umugongo ni ukuvuga aho agatirigongo kamwe gahurira n'akandi, ndetse igafata n'ibindi bice byegereye izo ngingo. Ni indwara iri mu bwoko bw'ama inflammation(ku

babara, kubyimba, gutukura, no kudakora kw'ahantu hafashwe n'uburwayi nibyo biranga inflammation.) Gusa icyo twabanza kuzirikana ni uko Ankylosing Spondilitis ari indwara idaterwa n'agakoko, nk'uko tubizi ku ndwara zimwe na zimwe.

• 0.2% by'abatuye isi barwaye iyi ndwara y'umugongo.

• 90% by'abayirwaye byaje kugaragara ko hari undi muntu wo mu muryango we wigeze kuyirwara(heredity).

• Ikunda kwibasira cyane abahungu aho usanga ikigereranyo cy'abahungu bayirwara ku bakobwa ari 5:1.

• Ubusanzwe itangira mu bwana, ariko ibimenyetso byayo bishobora kigaragara mu gihe cy'ubugimbi cyangwa mbere yaho ho gato.

• Ikimenyetso gikunda kugaragara cyane ku bafite ubu burwayi, ni ububabare (uburibwe bw'umugongo mu gice cyo hasi, cyangwa mu mayunguyungu ahagana inyuma .

DORE IBYO UTAZAHISHA MUGANGA KUKO ARIBYO AZAHERAHO AKEKA KO URWAYE ANKYLOSING SPONDILITIS :

• Kugira ububabare mu mugongo igice cyo hasi.

• Kuba ubwo bubabare ubumaranye igihe kirenze amezi atatu (3)

• Niba hari igihe ubwo bubabare bukubuza gusinzira, cyangwa ugakanguka ijoro rigeze hagati kubera kuribwa umugongo.

• Nanone umuntu ufite iyi ndwara y'umugongo, agira ikibazo cyo kumva ingingo zagagaye(zabaye ibigamba) ,igihe abyutse mu gitondo cya kare, ibyo akaba yabimarana nk'iminota 30.

•   Gukora imyitizo ngororamubiri, byorohereza umuntu urwaye ankylosing Spondilitis, maze akumva amerewe neza. Mu gihe kwicara hamwe, guhagarara ,kunama, cyangwa kuba umuntu ari hamwe gusa ,bituma ibimenyetso by'iyi ndwara birushaho kuzamba.

MU BINDI BIMENYETSO BYAYO TWAVUGA NKO:

• Kugira umunaniro

• Gutakaza ibiro

• Kugira umuriro utari mwinshi (low grade fever)

UMURWAYI ABA AFITE IBYAGO BYINSHI BYO:

• Guhetama Umugongo

• Kugabanuka k'ukwihina k'uruti rw'umugongo,igihe wihengekeye imbere cyangwa ku ruhande.

• Kugabanuka k'ukwaguka kw'igituza mu gihe umuntu yinjije umwuka mu bihaha.

UKO ANKYLOSING SPONDILITIS IVURWA :
IBISABWA UMURWAYI :

• Gukora imyitozo ngororamubiri (urugero nko kwiruka,koga,...)

• Imyitozo yo guhagarara wemye n'iyo guhumeka winjiza cyane umwuka mu bihaha.

• Kwirinda kwicara cyangwa guhagarara kuburyo umugongo uba utagororotse.

IBININI:
Ibinini byo mu bwoko bwa NSAIDs, urugero nka ibuprofen na aspirin, bigabanya ububabare bityo umurwayi agashobora kwikorera imirimo ye.
Niba wanywaga itabi ugomba guhita urireka kuko ryongera ibyago byo guhetama umugongo.
ESE IYI NDWARA Y'UMUGONGO MURI KUTUBWIRIRA YICA NYIRAYO?

• Akenshi iyi ndwara irikiza nubwo nanone hari igihe yongera kugaruka, ibi kandi bikaba bishobora kubaho ku myaka iyo ariyo yose waba ufite.

• Hari igihe umugongo uhetama ariko umuntu agakomeza ubuzima bisanzwe nta bubabare.

• Gukira bikunda kwihuta cyane iyo ari umugore uyirwaye nanone bikihuta ku muntu wafashwe n'iyi ndwara arengeje imyaka 40.

• Iyo yafashe uyirwaye kuva mu bwana hari igihe bimuviramo ubumuga bukabije, ku buryo kugirango umuntu akire bisaba kubagwa

Byateguwe na RUTAYISIRE François Xavier (a medical student who was in Year 4(DOC2) ,at University of RWANDA ,School of medicine). Now he is in Level 5 (Doc 3)

Sobanukirwa Pre-eclampsia, Indwara yo kubyimba amaguru n'ibirenge. Ikunda gufata abagore batwite!

Preeclampsia ni indwara ikomeye ikunda kwibasira  bamwe mu babyeyi batwite. Ikunda kwibasira abagore bafite inda iri hejura y’amezi atanu. Iyi ndwara kandi ishobora gufata  umubyeyi uri no ku bise, abyara cyangwa nyuma gato amaze kubyara.

Irangwa no kugira umuvuduko w’amaraso wo hejuru ndetse no gutakaza za Proteines.
Umubyeyi ufashwe n’iyi ndwara arangwa no kugira umuvuduko mwinshi w’amaraso (high blood pressure).
Umubyeyi kandi atakaza ibyubaka umubiri (proteyini) mu nkari ze (loss of protein in urine).
Kubera umuvuduko minini w’amaraso ndetse no gutakaza ibyubaka umubiri umwijima, impyiko, ndetse n’amaso bigira ibibazo.
Izindi ngaruka mbi z’iyi ndwara ni uko ababyeyi bashobora kubyara abana bafite ibiro bike.
Ni iki gitera pre-eclampsia?
Ubushakashatsi  bwinshi ntibuvuga impamvu ibitera,ubundi bwo  buvuga ko impamvu itazwi.
Ni bande bafite ibyago byo kugira preeclampsia?
Nubwo bigorana kwerekana impamvu nyayo itera pre-eclampsia abahanga berekana ko ababyeyi batwite bwa mbere hamwe n’abatwite impanga aribo bafite ibyago byinshi byo kuyirwara.
Abandi bagore bafite ibyago byo kwandura iyi ndwara ni abatwite impanga, abarwaye diyabeti, impyiko, ababyibushye, abayigize kunda iheruka, cyangwa se abafite umwe mu muryango wayigize.
Ni ibihe bimenyetso bya pre-eclampsia?
Ubusanzwe ababyeyi benshi bumva nta kibazo bafite keretse iyo iyi ndwara ikaze.
Bimwe mu bimenyetso umurwayi wa pre-eclampisa agaragaza ni umutwe umurya cyane, guhinduka mu kureba:kureba ibirorirori( umurwayi atabona neza amashusho amuri imbere),…kubabara mu nda cyane cyane mu gice giherereyemo igifu…
Ni gute pre-eclampsia itera ibibazo ku mwana umubyeyi atwite?
Umwana ashobora kudakura neza mu gihe ari mu nda, hashobora kandi kubaho igabanuka ry’amazi umwana aba arimo muri nyababyeyi.
Aha umubyeyi asabwa kwihutira kujya kwa muganga mu gihe yumva umwana atagikina neza mu nda.
Ese haba hari ibizamini byerekana ko umuntu arwaye pre-eclampsia?
Birahari rwose. Muganga, umuforomo cyangwa se umubyaza bazagufata ibipimo by’umuvuduko w’amaraso.Kimwe mu byerekana ko umubyeyi ayirwaye nuko azaba afite ibipimo biri hejuru y’140 kuri 90.
Urugero: umubyeyi wabwiwe ko afite ibipimo by’umuvuduko w’amaraso wa 150/96 azaba afite umuvuduko w’amaraso uri hejuru naho uzaba afite umuvuduko w’106/67 uzaba uri hasi.
Ikindi kizamini muganga afata ni ikizamini cy’inkari bakazijyana muri Laboratwari gusesengura ngo barebe ko nta ma proteyini ari mu nkari.
Ni gute pre-eclampsia ivurwa?
Umuti wa mbere wayo ni ukubyara umwana utwiswe.
Ariko Muganga  abanza kureba niba icyo gihe aboneye umubyeyi aribwo byaba byiza ko yabyara  cyane cyane no mu gihe n’ubundi yari yegereje kubyara cyangwa habaho gutegereza mu gihe yari akiri kure y’itariki yari kuzabyariraho.
Gusa muganga aha umubyeyi imiti igabanya umuvuduko w’amaraso ndetse n’iyindi irinda umubyeyi kugagara dore ko bishoboka cyane mu gihe umubyeyi atayibonye.
Ni ibihe byago uwagize pre-eclampsia yagira?
Uretse ibyavuzwe haruguru umubyeyi wagize pre-eclampsia ashobora kugira ibyago (complications) nko kuvira amaraso mu bwonko, kwangirika bikabije kw’impyiko byagera naho zasimbuzwa, kwangirika cyane k’umwijima n’izindi ngaruka nyinshi zitandukanye.
Babyeyi rero musabwe gukurikirana ubuzima bwanyu  n’ubw’uwo mutwite. Mujye kwa Muganga hakiri kare  kuko bazabafasha mu gihe babonye ikibazo hakiri kare.
src:umuseke.rw

Kuki Umugore utwite agira iseseme? Ese yahangana n'icyo kibazo ate?

 Impamvu abagore batwite bagira iseseme n'uko bayirinda!

Mu bagore 10 batwite, 7 muri bo usanga bahura n’ikibazo cyo kugira iseseme, mu buryo butandukanye bitewe n’imiterere y’imibiri yabo , aho ushobora gusanga bamwe inabazahaza cyane rimwe na rimwe ikababuza no kurya cyangwa se baba babashije kurya bakabiruka.

Kuva ku cyumweru cya 3 kugeza kucya 16 kuva umugore yasamye ni bwo usanga yatangiye kugira iseseme aho usanga benshi batangira kuruka buri gitondo ndetse kuri benshi bukarinda bwira ariko bimeze, ahanini rero ibi biba byatewe n’impamvu zitandukanye harimo  imisemburo imwe n’imwe iza mu mubiri iyo umugore amaze gusama,  igogorwa rishobora kuba ritagenze neza ndetse n’ibibazo byo mu mutwe umugore utwite ashobora kuba afite.

Gusa nubwo nta muti nyakuri uvura iseseme ubaho ariko ko hariho ubundi buryo umugore utwite ashobora gukoresha kugira ngo abe yakwirinda iki kibazo cyo kugira iseseme.
Uburyo bwo kwirinda iseseme ku mugore utwite rero ni ubu bukurikira:

- Kurya  utuntu turyohereye nk’Ibisuguti nk’ifunguro rya mu gitondo ariko mbere yo kubafata akabanza kwicara arambije hasi amaguru ari ari  hasi ku butaka.
- Kwirinda kurya byinshi ndetse no kwirinda ko mu nda habamo ubusa. Agomba gufata ibiryo bicye cyane nyuma ya buri masaha atatu.
- Gucungana n’uko yumva nta kibazo cy’inzara afite cyangwa se kuba yumva yahaze cyane.
-Kwirinda gufata amafunguro akomeye kuko agora igogorwa ritagenda neza, ayo mafunguro arimo ibinure, vinaigre, ibishyimbo, amashu n’ibindi biribwa bishobora gutuma igogorwa ritagenda neza.
- Kwibanda ku gufata ibiribwa bikungahaye  kuri carbone, nk’ibitoki, ubugali, ibinyampeke, n’ibindi nkabyo.
-Kwirinda kunywa  ibintu birimo caffeine, ikiribwa nk’inyama kuko ari byo bikaza cyane ya misemburo ituma wagira iseseme.
-Kuryama no kwicara ahantu hafutse kandi hari akayaga.
-Gusinzira neza kandi akamara ibitotsi kuko ngo kudasinzira ngo ibitotsi bishire byongera  umunaniro, kandi umunaniro uri mu byongera iseseme.
-Kwirinda ibiribwa cyangwa se n’ibindi bintu bifite impumuro zitamye nk’imibavu, umwuka wo mu gikoni n’ibindi.
-Kunywa  ikirahuri cy’amazi arimo umutobe w’indimu. 

Indwara yo Kugira impumuro mbi(kunuka) mu gitsina, n'uko wayirinda.Dore icyo wakora niba uyirwaye

Kugira impumuro mbi mu gitsina n’ubwo waba wakarabye ni ikibazo yaba k'uwo bibaho ndetse no k'uwo babana cyangwa se uwo bashakanye. Biterwa rero n’impamvu zitandukanye gusa zimwe muri izo mpamvu zishobora kwirindwa . Ni muri uwo rwego tugiye kubagezaho ibintu bitera impumuro mbi mu gitsina, uko wabyirinda n’icyo wakora igihe ufite icyo kibazo.

Impamvu zitera impumuro mbi mu gitsina:
Kuba ufite uburwayi ( infections): ushobora kurwara infections ziterwa no gukora imibonano mpuzabitsina n'urwaye ayo ma infections uwo mwayikoranye akaba afite ahandi yazikuye bikaba byagutera impumuro mbi mu gitsina.
Indwara bita mycose vaginale: iyi ndwara nayo izana impumuro mbi mu gitsina ikaba igaragazwa no kugira uburyaryate mu gitsina, ubushyuhe buryana, ndetse rimwe na rimwe ukajya wumva ari nk’akantu kakurumye. Ushobora no kugira amabara y’umutuku cyane mu imbere mu gitsina, hakazamo n’udusebe dutukura. Uyirwaye usanga akunda gushima mu gitsina.
Kogesha amasabune mu gitsina: ubundi igitsina cy’umugore giteye ku buryo kikorera isuku y’imbere ahubwo wowe ugasabwa gukoresha amazi meza gusa ukuraho imyanda iba yavuyemo imbere, wirinda kugeza amazi n’isabune imbere mu gitsina.
Hari bamwe bibwira ko gukoresha amasabune n’amadeadorants aribyo bizatuma hahumura neza nyamara ibyo bituma hahumura nabi kurushaho ndetse bikaba byagutera n’ubundi burwayi.
Ibi akenshi bikunze gukorwa n’abantu batangiye kumva mu gitsina cyabo hahumuye nabi ku bw’impamvu zitandukanye aho kwivuza bagahitamo kujya bahoza cyane no gukoresha za deaodorants.
Imyenda y’imbere idafite isuku ihagije: imyenda y’imbere nayo ishobora kugutera indwara ukaba wagira impumuro mbi mu gitsina. Ni byiza rero kujya uyimesa neza, ukayanika ahantu hagera imirasire y’izuba kandi ukibuka kujya uyitera ipasi mbere yo kuyambara. Ni byiza na none kwambara amakariso ya cotons kuko ariyo adatera ubushyuhe.
Ubwiherero budafite isuku: ubwiherero budafite isuku nabwo butera impumuro mbi mu gitsina cyane iyo ugiye nko kwihagarika inkari zikajya zigutarukira cyangwa se ukicara ku bwiherero butakorewe isuku ihagije cyane iyo ari bumwe bwo mu bwoko bwa siege bicaraho ikibuno gifasheho.
Kurya ibintu birimo imisemburo myinshi: hari ibiryo turya nabyo bikaba byatuma ugira impumuro mbi mu gitsina cyane cyane ibirimo imisemburo.
Icyo wakora mu gihe ufite impumuro mbi mu gitsina:
• Irinde kuba wakoresha amasabune na za deodorants wibwirako bizagabanya impumuro mbi kuko byangiza imyanya ndangagitsina ndetse bikongera ibyago byo guhumura nabi kurushaho.
• Kujya kwivuza kuko niba impumuro mbi iterwa no kuba ufite infections n’ubundi burwayi bishobora no gutuma wangirika ibice bigize imyanya myibarukiro bikaba byanagutera ubugumba.
• Niba umugabo yumvise ko umugore we asigaye ahumura nabi mu gitsina agomba kubimubwira yitonze akaba yajya kwivuza.
 • Kwikuramo isoni: abantu benshi bagira isoni zo kujya kwivuza indwara zifata imyanya ndangagitsina ugasanga bibagizeho ingaruka zikomeye. Byaba byiza rero gutinyuka ukajya kwa muganga aho gukomeza kwihererana ubwo burwayi kuko iyi ndwara ifite imiti iyivura igakira. • Irinde gukomeza gushyira urubanza k’uwo mwashakanye: abantu benshi bibwira ko iyo bafite zimwe mu ndwara zifata imyanya ndangagitsina biba byaturutse kuwo bashakanye ugasanga aho kujya kwivuza bahora babicyurirana hagati yabo.
Kugira impumuro mbi mu gitsina ubonye uko wabyirinda ndetse n’uko wabyitwaramo igihe waba ufite iki kibazo. Byaba byiza rero wubahirije izi nama kuko impumuro mbi mu gitsina ari indwara mbi ndetse ikaba inateza ibibazo mu miryango.
Src: agasaro.com

Menya indwara ya vitiligo, ituma umuntu azana ibibara by'umweru ku ruhu rwe.

Indwara ya vitiligo ifata uruhu

Ndabahaye Mwiriwe!Jewe Ndiburundi Mu kirundo Nashaka Mumfashe Mumbwire, Nashaka Kubaza Kungwara Ifata Umuntu Akagira Amabara Kumubiri Ukamenga Numwema(NYAMWERU)! None Iterwa Niki? Iravurwa Igakira? Bayivura Gute? Murakoze!

Nkuko uno mugenzi wacu yabajije ikibazo abinyujije kuri page yacu ya facebook(Baza Muganga), indwara ya Vitiligo ihangayikishije benshi, kandi benshi bayibazaho byinshi. Reka dusubize ibibazo bijya biyibazaho.

Indwara ya Vitiligo irangwa no kuzana amabara y'ibidomagure by'umweru ku ruhu.Ushobora kuba warigeze kubona umuntu afite amabara y'umweru mu maso cyangwa ku bindi bice by'umubiri. Uwo muntu ashobora kuba yari arwaye vitiligo iyi ndwara rero ikaba iterwa no kubura umusemburo wa « Melanin ».

Uno musemburo wa « Melanin » uboneka mu ruhu niwo utuma rusa uko rwakagombye gusa, hanyuma ibura ryawo rikunze guterwa no gusenyagurika cyangwa gupfa k'uteramangingo tuwukora bigatuma umuntu azana amabara y'umweru ku ruhu. Indwara yo kuzana amabara (Vitiligo) ishobora kwibasira abantu b'amabara yose ariko ikunze guhita igaragara cyane ku bantu bafite uruhu rw'igikara(Abirabura) kurusha abafite uruho rw'umweru(Abazungu).

Indwara yo kuzana mabara yibasira abanyamerika bari hagati y'umwe na babiri ku ijana (1-2%) kuko ngo nibura ushobora gusanga abanyamerika bari hagati ya miliyoni ebyiri n'enye bibanira na yo.

Inshuro nyinshi indwara y'amabara yibasira bantu bakiri bato bari hagati y'imyaka icumi na mirongo itatu y'amavuko hanyuma ugasanga abagera kuri mirongo cyenda ku ijana (90%) byabo bagaragaza ibimenyetso mbere y'uko buzuza imyaka mirongo ine y'amavuko. Ari abagabo ndetse n'abagore baba bafite ibyago bingana byo kuyirwara.

Indwara yo kuzana amabara ishobora kuba uruhererekane rw'imiryango kuko usanga abantu bafite umuntu mu muryango wayirwaye n'abafite mu muryango wabo ikibazo cyo guhinduka ikigina umusatsi,  baba bafite ibyago byinshi by'uko hazagira undi uyirwara. Abantu basanganywe indwara ziterwa n'uko abasirikare b'umubiri barwanya uteremangingo twawo (autoimmune diseases) na bo ibyago byo kuyirwara biri hejuru.  Ayo mabara aza aho ariho hose ku ruhu kandi buri wese ashobora gufatwa n’ubwo burwayi. Vitiligo ni indwara itandura kandi uko amabara yera egenda akura ni nako umuntu aba ashobora kurwara kanseri y’uruhu ku buryo bworoshye.

Igitera Vitiligo

Mu ruhu habamo utanyangingo twitwa Melanocytes tuba dushinzwe guha ibara uruhu , iyo melanocytes zo ku gice runaka cy’uruhu zitari gukora akazi kazo , uruhu rwaho ziri ruba umweru nibwo bavuga ko umuntu arwaye Vitiligo.

Igituma izo melanocyte zihagarara gukora kugeza ubu ntikiramenyekana neza ariko akenshi iyo mu muryango  umuntu avukamo  harimo abantu bagiye barwara  iyo ndwara usanga ikurikirana abavutse muri uwo muryango.

Vitiligo kandi ikunze kugaragara ku bantu bafite uburwayi bukurikira:

• Indwara ya anemie cyane cyane iyitwa(Pernicous anemia), iterwa no kubura icyitwa intrinsic factor gifasha mu gutwara ibintu byifashishwa n'umubiri mu gukora amaraso.
• Kugira umusemburo mwinshi ukorwa na n'igice cyo mu mubiri
  
  cyitwa thyroid (Hyperthyroidism)
• Indwara yitiriwe Addison(Addison Disease).

Bimwe mu bimenyetso bigaragaza ko umuntu agiye kurwarwa Vitiligo:

Kuzana utubara twera aha hakurikira:

1. Mu maso
2. Ku minwa
3. ku biganza
4. Ku maboko
5. Ku birenjye.
6. Mu kwaha
7. Mu jisho imbere
8. Ku myanya ndanga gitsina
9. Ku mazuru

Vitiligo ivurwa ite

1. Muganga ashobora gutanga umuti witwa Dermovate ku bantu bari basanzwe ari inzobe cyane cyangwa ku  bazungu ariko si  byiza gukoresha uwo muti atari muganga wawukwandikiye kuko ugira izindi ngaruka zitari nziza ku ruhu
2. Undi muti ukunze gukoreshwa ni uwitwa Meladine solution 0,1% , Meladine solution 0,75%  yo kwisiga ku ruhu cyangwa Meladine 10 mg  y’ibinini byo kunywa. Iyo miti yose itangwa iyo ufite urupapuro rwa muganga.
3. Ubundi buryo bukoreshwa mu kugirango Vitiligo ntigaragare ni ugusiga amabara asa n’uruhu rwawe ahabaye umweru(maquillage).
4. Mu bihugu byateye imbere bafite ubundi buryo bwinshi bakoresha mu kuvura Vitiligo nko gufata uruhu rushyashya bakuye ahatarwaye, bakarutera aharwaye(skin graffting), cyangwa gutera amabara asa n’uruhu ahantu harwaye (teinture) n’ubundi bwinshi .

Nubwo ubwo buryo bwose buri haruguru bufasha mu kugabanya ayo mabara yera, Vitiligo ni indwara idakira burundu kandi nta buryo bwo kuyirinda bubaho.

Niba urwaye iyi ndwara nta mpamvu yo guhangayika ngo wumve ko bikurangiranye cyangwa ngo wumve wigunze , Vitiligo ni indwara itica.

Edited from: tohoza.com, umuseke.rw

Indwara y'ibihushi ifata ku ruhu! dore ibiyiranga n'ibimenyetso byayo

Indwara y'ibihushi

Ibihushi n’indwara iterwa n’agakoko kataboneshwa ijisho kazwi ku izina rya ” dermatophyte”mu ndimi z’amahanga. Ako gakoko kibera inyuma ku ruhu, ku turemangingo twapfuye (tissus mortes). Ntikajya kinjira imbere mu turemangingo two mu mubiri  kuko gatungwa n’utwoya twose tuva mu ruhu ugasaga aho ako gakoko kororokeye umubiri wahinduye ibara. Agakoko ka dermatophyte  kameze nk’ibihumyo bitaribwa bigenda bigakurira k’ugishishwa cy’igiti.

Agakoko ka dermatophyte gafite ishusho imeze nk’impeta kagira ibara ritukura.  Gakunze kwibasira inyuma y’uruhu,umusatsi ndetse n’inzara kuburyo igice cy’umubiri kafashe kahasiga ubusembwa ugasanga uruhu rwatonnye amabara atandukanye. 

Indwara y’ibihushi yibasira cyane cyane  abana bari munsi y’imyaka 12 uretse ko n’abantu bakuze hari igihe usanga bayirwaye. 

Iyi ndwara ishobora kwandura   umuntu k’uwundi mugihe basangiye ibikoresho byifashishwa n’abogoshi,ibisokozo,ingofero, gutiririkanya imyenda ndetse n’igihe uruhu rw’ umurwayi wayo arukubye k’uruhu  rw’umuntu atayirwaye.

Indwara y’ibihushi irangwa n’uko umusatsi uba washize k’umutwe,uburibwe bukabije inyuma k’uruhu bigatuma umurwayi yishimagura,aho ako gakoko kaba k’ibasiye kahashyira ishusho y’uruziga ifite ibara ry’umutuku cyangwa umweru bitewe naho kibasiye.

Bumwe mu buryo bwo kuyirinda ni uguhorana isuku y’uruhu,kudatiririkanya imyenda ndetse n’ibikoresho by’ubwogoshi.

Indwara y’ibihushi ntiyibasira abantu gusa kuko zimwe mu nyamaswa zirimo imbwa n’injangwe zikunze kwandura iyondwara kuburyo zinayanduza n’abana ubushakashatsi bwakozwe n’abahanga ku ndwara z’uruhu  bagaragaza ko 20% by’abantu barware indwara y’ibihushi bayandurjwe n’inyamaswa.

Indwara y’ibihushi  iravurwa igakira hakoreshejwe umuti wa Antifungal drugs, isabune ya shampoo ndetse hari na Poudre yabugenewe kwa muganga basiga ku uruhu.

Mu gihe umwana wawe yatangiye kukaragaza ibimenyetso by’indwara y’ibihushi n’ibyiza guhita umujyana kwa muganga.

Source: UMUSEKE.RW

Sobanukirwa ibirebana n'Ifishi yo Gukurikirana Imyaka n’Ibiro by’Umwana

Ifishi yo Gukurikirana Imyaka n’Ibiro by’Umwana:
Iyi fishi ikoreshwa mu kuzuza amakuru arebana n’imikurire y’umwana uko igihe kigenda. Ayo makuru yandikwa ku ifishi akaba ari imyaka n’ibiro by'umwana. Mu RWANDA hari gahunda ya Buri kwezi, aho ababyeyi bakangurirwa gupimisha abana babo ku bajyanama b'ubuzima. Umujyanama wubuzima akaba aba agomba gupima ibiro by’abana bose bari mu gace ukoreramo akandika Imyaka/Ibiro ku mafishi y’imikurire yabo.
Icyo iriya fishi isobanura:
Umutuku = umwana agomba guhita yoherezwa ku ivuriro.
Umuhondo = Imirire y’umwana igomba kugenzurwa n’umuryango ukigishwa uburyo bwo guha umwana ifunguro ryuzuye.
Icyatsi kibisi = umwana afite ubuzima bwiza. Umuryango ugomba gushimirwa no gukomeza ishyaka mu kugaburira umwana neza.